Forseti tekur á móti nýjum sendiherra Frakklands, Guillaume Bazard, sem afhendir trúnaðarbréf sitt á Bessastöðum. Rætt var um traust samskipti Íslands og Frakklands, öryggismál Evrópu, einkum innrás Rússlandshers í Úkraínu og nauðsyn þess að ríki álfunnar standi saman andspænis þeirri vá. Einnig var rætt um möguleika á samstarfi Íslands og Frakklands í umhverfismálum, ekki síst á sviði umhverfisvænna orkugjafa. Að lokinni afhendingu trúnaðarbréfs var boðið til móttöku fyrir embættismenn, fulltrúa viðskipta og menningar og aðra sem sinna samskiptum Íslands og Frakklands.