Forseti tekur á móti nýjum sendiherra Kína, He Rulong, sem afhendir trúnaðarbréf sitt á Bessastöðum. Rætt var um samskipti Íslands og Kína í áranna rás; undir lok síðasta árs var hálf öld liðin frá því að ríkin tóku upp stjórnmálasamband. Meðal annars var rætt um væntanlega fjölgun kínverskra ferðamanna á Íslandi og möguleika á auknu samstarfi á sviði jarðhitanýtingar og sjávarútvegs. Forseti kynnti sjónarmið íslenskra stjórnvalda í sambandi við innrás Rússlandshers í Úkraínu og sendiherra rakti sjónarmið kínverskra stjórnvalda. Þá lýsti forseti afstöðu Íslands á sviði kynjajafnréttis, umhverfisverndar og mannréttinda.