Forseti flytur ávarp við opnun sýningar á ljósmyndum Gunnars G. Vigfússonar á Þingvöllum. Í um hálfa öld hefur Gunnar tekið myndir í þágu embættis forseta Íslands. Í gestastofu þjóðgarðsins á Þingvöllum hefur nú verið opnuð sýning á ljósmyndum Gunnars frá þjóðhátíðum og heimsóknum þjóðhöfðingja og annarra tiginna gesta til Þingvalla. Í máli sínu þakkaði forseti Gunnari fyrir framlag hans til þess að varðveita sögu forsetaembættisins og þjóðarinnar í myndum og minnti á mikilvægi ljósmynda sem sögulegra heimilda.