Á síðara degi heimsóknar sinnar til Cornell háskóla í New York sat forseti fyrst morgunverðarfund með hópi nemenda og starfsmanna og ræddi við þau um málefni tengd Íslandi. Þá var farið í Íslandsdeild bókasafns skólans sem kennd er við Íslandsvininn Willard Fiske og þar sýndi Patrick Stevens bókavörður úrval fágætra bóka og handrita úr safninu. Loks ræddi forseti við starfsfólk landbúnaðardeildar háskólans þar sem unnið er að rannsóknum á ofnæmi í íslenskum hestum í samstarfi við íslenska vísindamenn.