Í vikunni sem leið voru tíðar gestakomur á Bessastöðum en í vikulokin lá leið okkar hjóna af landi brott.
Á mánudag tók ég á móti hópi fulltrúa Norðurlandaráðs og Eystrasaltsþingsins, ásamt gestum þeirra úr röðum stjórnarandstöðunnar í Belarús og Rússlandi og fulltrúum úkraínskra stjórnvalda. Rætt var hvernig Eystrasaltsríkin og Norðurlönd geta stuðlað að jákvæðri þróun til framtíðar á þessum slóðum.
Á þriðjudag afhenti Anu Irene Laamanen trúnaðarbréf sitt sem sendiherra Finnlands á Íslandi. Af því tilefni bauð ég til móttöku fyrir embættismenn og aðra sem sinna samskiptum Íslands og Finnlands.
Þá tók ég á móti forystusveit Golfsambands Íslands og fulltrúum golfklúbba um land allt í tilefni 80 ára afmælis sambandsins. Viðeigandi var að marka þau tímamót á Bessastöðum því Sveinn Björnsson, fyrsti forseti Íslands, má einnig teljast einn fyrsti kylfingur landsins og sló kúlur á túnum Bessastaða á sínum tíma, að vísu með misjöfnum árangri.
Þá um kvöldið tókum við Eliza á móti úkraínska rithöfundinum Andrej Kúrkov, handhafa Alþjóðlegra bókmenntaverðlauna Halldórs Laxness í ár, og eiginkonu hans Elizabeth Sharp. Nýjasta verk Kúrkovs, sem kom út nú í september, er dagbók frá aðdraganda innrásar Rússa í Úkraínu en Kúrkov ferðast nú víða um heim og fjallar um þær hörmungar.
Á miðvikudag lá leið mín austur fyrir fjall þar sem ég sótti hátíðarstund í listasmiðjunni Líf og list í Flóahreppi, til heiðurs Sigríði Kristjánsdóttur, tréskurðarmeistara og listakonu. Síðdegis átti ég fund með alþjóðaforseta Lions hreyfingarinnar, Brian E. Sheehan, og konu hans Lori.
Loks varð ég þeirrar ánægju aðnjótandi að taka á móti íslenskum húsgögnum sem verða til sýnis og notkunar í suðurstofu Bessastaða næstu árin. Þar hefur íslensk hönnun verið í öndvegi frá árinu 2019 og eru húsgögnin valin í samráði við Hönnunarmiðstöð Íslands og Samtök iðnaðarins.
Á fimmtudag flutti ég ávarp við setningu fræðsludags MND-félagsins og bauð formanni og öðrum fulltrúum félagsins til móttöku að Bessastöðum. Síðdegis tók ég svo á móti nemendum og starfsliði Landgræðsluskóla Gró. Þau koma frá ýmsum ríkjum Afríku og Asíu og hafa kynnt sér aðgerðir á sviði landgræðslu hér á landi, meðal annars endurheimt votlendis líkt og unnið hefur verið að á Bessastöðum.
Eldri borgarar frá Akranesi komu einnig í heimsókn á Bessastaði þann dag, í fræðslu- og skemmtiferð á vegum Verkalýðsfélags Akraness.
Fimmtudaginn 8. september bárust tíðindin af andláti Elísabetar II. Bretadrottningar og færði ég bresku konungsfjölskyldunni og öllum íbúum Samveldisins samúðarkveðjur fyrir hönd íslensku þjóðarinnar. Á föstudag lögðum við Eliza leið okkar í sendiráð Bretlands á Íslandi þar sem við rituðum nöfn okkar í minningabók um drottningu.
Nú um helgina höfum við síðan verið í Kaupmannahöfn þar sem þjóðhöfðingjar Norðurlanda komu saman ásamt fleirum til heiðurs Margréti II. Danadrottningu í tilefni 50 ára krýningarafmælis hennar fyrr á þessu ári.
Frekari upplýsingar um þessa viðburði má sjá á heimasíðu forsetaembættisins, www.forseti.is. Góðar stundir.
Birtist fyrst á facebook-síðu forseta 12. september 2022.
